Land næturinnar (2023)

Vilborg er ekki aðeins bráðflinkur fléttusmiður í skáldsögu heldur óvenjulega skarpeygur fræðimaður og ég veit fá eða engin skáld sem mér þykir hagari í að giska á hverju heimildir þegja yfir. ... Fyrir þann sem varið hefur tugum ára til að reyna að skilja hulda dóma miðaldafræðanna er ómetanlegt að fá í hendur verk sem ekki er aðeins spennandi, hrikalegt og gagnrýnið heldur einnig fullt af mannelsku, jafnvel þegar lýst er inn í myrkurhella sögunnar.
 Heimir Pálsson
​
Ég verð að segja ykkur að þessi bók er frábær. Lesið hana, segi ég og skrifa! Hérna fléttar Vilborg listilega viðburðaríka sögu Þorgerðar og svo lifandi og léttur var frásagnahátturinn að ég var lengst af með lífið í lúkunum. Alls óviss um hvort eða hvernig þetta myndi allt bjargast. En þar með er ekki allt sagt því Land næturinnar er ekki bara saga af sterkri konu sem stendur frammi fyrir erfiðum raunum, heldur er hún stútfull af áhugaverðum og eftirminnilegum sögnum og lýsingum á mannlífi og þar geta jafnvel ár snúið við í farvegi sínum.
Matthildur Helgadóttir Jónudóttir
 
Dásamleg bók, vel skrifuð og spennandi. Gígja Sveinsdóttir

Nú hef ég lesið Land næturinnar og er gjörsamlega frá mér numin. Áður en ég hóf lesturinn, las ég bókina Undir Yggdrasil (aftur) og nú er ég bara alveg í vandræðum, finn enga bók sem mig langar til að lesa, það virðist bara ekkert vera nógu spennandi eftir þessa veislu. Vilhelmína Þór
 
Spennandi og vel skrifuð bók. Full af fróðleik, sem yfirgnæfir þó ekki skáldskapinn og þétta fléttuna. ... Sögusviðið á slóðum Rúsa og Pechenega mjög lifandi og sagan af ferðum Þorgerðar Þorsteinsdóttur áhugaverð. Hef ekki lesið betri bók eftir Vilborgu síðan Korkusaga kom út.  Unnur Lárusdóttir

Þakka þér fyrir bókina, hún var frábær eins og allar þínar bækur.  Eygló Kristjánsdóttir
 
Ég átti bágt með að leggja bókina frá mér fyrr en hún var öll, þar sem söguþráðurinn nær að halda manni í spennu allan tímann. Vilborg fer með lesandann í magnaðar seiðferðir fyrri alda auk annarra áhættuferða, sem fær mann til að gleyma stund og stað. Fortíðin lifnar svo sannarlega við í þessari sögu, og er eins og maður standi ljóslifandi við hlið söguhetjunnar Þorgerðar! Helga Magnea Steinsson

 Ég naut þess að lesa bókina hægt og ég las tvisvar um ferð Þorgerðar til undirheima, hvílík lýsing, þetta var ljóslifandi. Illskan og mansalið var svo sterkt að maður gat ekki annað en hugsað um það sama í nútímanum. ... Það kæmi mér ekki á óvart að Land næturinnar yrði meðal tilnefndra bóka hjá Íslensku bókmenntaverðlaununum.
Takk fyrir þessa stórkostlegu bók. Regína Eiríksdóttir. 

Ég reyndi að treina mér bókina sem mest ég mátti en samt lauk henni á undraskömmum tíma. Bókin býr yfir hreinum göldrum þar sem hún lét mig án nokkurrar fyrirhafnar þjóta þúsund ár aftur í tímann og sjá útlit og líf formóður minnar ljóslifandi fyrir mér. Oft fannst mér gott að vita að Þorgerður kæmist aftur til Íslands því þá vissi ég að hún myndi vinna sigur í hverri raun sem hún lenti í en sú vitneskja skemmdi samt aldrei spennuna fyrir mér. Þegar bókinni lauk fylltist ég söknuði og ætla því að lesa hana aftur mjög fljótlega.
Kæra Vilborg, takk fyrir yndislega bók og til hamingju með þessi snilldarskrif. Svanheiður Ingimundardóttir
​
Þorgerður Þorsteinsdóttir hefur lifað mikinn harm heima á Íslandi og heldur til Noregs þar sem örlögin leiða hana í faðm skinnakaupmannsins Herjólfs Eyvindarsonar. Saman halda þau til Garðaríkis, á fund væringja sem sigla suður Dnépurfljót og yfir Svartahaf með ambáttir og loðfeldi á markað í Miklagarði. Í landi næturinnar bíða þeirra launráð og lífsháski. Á augabragði er Þorgerður orðin ein meðal óvina og kemst að því að stundum kostar það meira hugrekki að lifa en deyja. ​

Land næturinnar er áhrifamikil og spennandi skáldsaga sem hefst þar sem þræðinum sleppti í fyrri bókinni um Þorgerði, Undir Yggdrasil, en fyrir hana var Vilborg Davíðsdóttir tilnefnd til Fjöruverðlaunanna 2021. Hér leiðir hún lesendur enn í ævintýraför og opnar nýja sýn á slóðir víkinga í Austur-Evrópu. ​
​Sögusvið Lands næturinnar er Austurvegurinn, verslunarleið norrænna manna á víkingaöld eftir fljótum og vötnum Austur-Evrópu suður til borgarinnar Konstantinópel sem þeir nefndu Miklagarð.

​Dómar
​gagnrýnenda

Dómnefnd Íslensku bókmenntaverðlaunanna
Vel skrifuð, þræl­spenn­andi og áhuga­verð bók. Heim­ilda­vinna skil­ar lif­andi lýs­ingu á menn­ingu, lífs­hátt­um og ferðum forn­manna sem hríf­ur les­anda með sér. Vil­borg sæk­ir í ís­lensk­an sagna­brunn og má segja að Land næt­ur­inn­ar sé kór­óna á sér­lega vönduðu höf­und­ar­verki und­an­farna ára­tugi.

Kolbrún Bergþórsdóttir og Ingibjörg Iða Auðunsdóttir / Kiljan RÚV
Þetta er mjög viðburðarík saga, frekar hæg í byrjun en svo fer allt af stað og Þorgerður verður ambátt ... hún fer meðal annars niður til Heljar og undir lokin er hún í lífshættu og maður sér ekki að henni verði bjargað. Þannig að hún verður æsispennandi. ... Það sem verður að nefna er hversu vel Vilborgu tekst að lýsa þessum tíma, tíðaranda, lífi fólks ... maður gat ekki annað borið virðingu fyrir og smitast af ástríðu hennar. ... Þetta er besta bókin hennar, ég fullyrði það. - Kolbrún Bergþórsdóttir 

Ég ber svo mikla virðingu fyrir höfundi sem leggur svona mikið í að rannsaka efnið sitt, koma því skilmerkilega frá sér og skrifa töfrandi söguþráð sem að hrífur mig með sér... Það verður ekki annað sagt en að þetta sé gífurlega vel rannsakað, allar staðarlýsingar, ferðalýsingar, og svikin og dauðdagarnir í þessari bók eru náttúrlega svakaleg... Spennan er mjög áþreifanleg og alltaf þegar maður heldur að þetta sé að fara að verða fyrirsjáanlegt og hlutirnir færist í betri farveg þá kemur eitthvað upp á. Maður sér ekki fyrir endann fyrr en síðustu blaðsíðu er flett. - Ingibjörg Iða
Umfjöllunin í heild í bókmenntaþættinum Kiljunni 21. febrúar 2024 

Lilja Magnúsdóttir / Lestrarklefinn 
Frásögnin er hröð, fléttan er flókin og spennandi frá fyrstu síðu og ekki spillir fyrir þó fyrri bók hafi ekki verið lesin. Vilborg fer lipurlega að því að rifja upp það sem lesandinn þarf að vita til að sagan komi lesandanum ekki í opna skjöldu, án þess að slík upprifjun verði of langdregin eða ítarleg. Persónusköpunin er gríðarlega vönduð, aldrei er taumur dreginn með ákveðnum persónum, allar sitja þær jafnt við borðið hjá Vilborgu, hún dæmir aldrei. Meira að segja Járngerður, með sín illu klækjabrögð, höfundur er algjörlega hlutlaus í hennar garð og lesandinn þarf sjálfur að mynda sér skoðun. Eina nærvera höfundar í persónusköpun er ást hennar og virðing á formæðrum okkar, Vilborg virðist hafa lagt sjálfa sig í hendur þessara kvenna og fengið blessun þeirra fyrir. Fyrir vikið erum við rík að eiga slíkan höfund, sem tengir sig þessum fornu konum og skrifar þær inn í skáldsögur sínar svo þær birtast manni sem ljóslifandi beint af síðum bókanna. Frásögnin flæðir, Vilborg leikur sér að íslenskunni ... Land næturinnar er ástarsaga, hún er dramatísk, hún er spennusaga og á köflum húmorísk."
Dómurinn í heild í Lestrarklefanum

Kristján Jóhann Jónsson / Morgunblaðið 
🌟🌟🌟🌟
Það er ekki heiglum hent að styðjast við Íslendingasögur í skáldskap en halda samt jafnvægi og skrifa texta sem er sjálfstæður og sterkur en bugast ekki af samanburðinum við fyrirmyndina. Þetta getur Vilborg Davíðsdóttir og gerir snilldarvel. ... Land næturinnar er líka afar vel gerð spennusaga. ... Hún byggir í þessu skáldverki sínu á mikilli þekkingu sem heldur því saman og hlýtur að skapa traust hjá lesendum. Hún sýnir jafnframt magnaðan skilning á trú og tilfinningum þess fólks sem hún lýsir, fyrst og fremst kvennanna, og gengur á milli fortíðar og nútíðar eins og völva sem gengur milli heima dauðra og lifandi og bæði veit og skynjar hvað er títt í veröldinni. Þekkingin og tilfinningin eru þannig séð eins og andlit Janusar, annað þeirra horfir fram en hitt aftur. Höfundinn brestur hvorki undirbúningsvinnu né innsæi í skáldsögunni Land næturinnar.
​
Soffía Auður Birgisdóttir / Víðsjá Rás 1 
Allt frá upphafi er frásögnin þrungin spennu og Vilborgu tekst mjög vel að flétta frásögnina þannig að lesandinn er óþreyjufullur að vita hvernig sögunni vindur fram ... Vilborg Davíðsdóttir fléttar frásögn sína af mikilli fagmennsku og kunnáttu. Hún spinnur plott og hliðarplott af mikilli list og tekst oftar en ekki að koma lesandanum á óvart með óvæntum vendingum.
 
... Í bókunum um Auði djúpúðgu og Þorgerði Þorsteinsdóttur setur höfundur í raun fram tilgátur um fjölbreyttari og flóknari landnámssögu Íslands en við finnum í sagnfræðiritum. Þær tilgátur hafa margar fengið stuðning í nýlegum rannsóknum á sviði bókmenntafræði, sagnfræði, fornleifafræði og erfðafræði. Sögulegar skáldsögur Vilborgar Davíðsdóttur eru því fyrirtaksdæmi um listræna úrvinnslu á fornum arfi sem byggir á fjölbreytilegum heimildum og rannsóknum fræðimanna. Lesandinn fær mikið fyrir sinn snúð því bækurnar eru afbragðsvel skrifaðar, með viðburðaríkri og spennandi sögufléttu.
 Hér er pistillinn í heild á vefsíðu RÚV.  

 Eva Halldóra Guðmundsdóttir / Lifðu núna        
Land næturinnar eftir Vilborgu Davíðsdóttur er áhrifamikil og heillandi bók. Vilborg er orðinn sérfræðingur í að endurskapa andrúmsloft víkingaaldar og þjóðveldistímans hér á landi. Að auki er henni einkar lagið að byggja upp spennu og búa til einstakar persónur sem lesandanum þykir vænt um og óskar alls hins besta. Þær eru þó alls ekki gallalausar og mætti kannski segja að þær væru flóknar eins og mannfólk almennt er ... Þessi saga er svo lifandi og skemmtilega sviðsett að einhver kvikmyndagerðarmaður ætti að stökkva á réttinn til að gera bíómynd eftir sögunni. Lesandinn sér ljóslifandi fyrir sér fólk, fundi, hátíðahöld, híbýli og ekki síst skipin á siglingu eftir voldugum ám og niður flúðirnar sem nú eru horfnar. Hér er allt sem þarf, búningarnir, leikmyndin og stórkostleg örlög. Allt listavel fléttað. Vilborg heldur lesandanum föngnum bókina á enda og það er með ákveðnum trega að henni er lokað.
Greinin í heild er hér.
​
​   ​